Signallarimiz natijasi: 2026-yil 3-chorak ochiq hisoboti

Bu — choraklik seriyamizning birinchi soni: signallarimiz qanday natija bergani, yutqazganlari bilan birga. Biz "win rate 90%" degan reklama yozmaymiz. Raqamlarni o'zingiz tekshira olasiz: hammasi track record sahifasida, har bir signal alohida.

Signalni qanday o'qish va bu raqamlar nimani anglatishi haqida: Signal nima va nima emas.

Qaysi davr va qaysi ma'lumot

• Davr: 2026-yil 3-chorak (iyul–sentabr). Lekin ochiq tarix 12-avgustdan boshlanadi — ya'ni bu amalda ~7 haftalik natija, to'liq chorak emas.
• Manba: ochiq track record ma'lumoti, holat 2026-yil 2-oktabr, 19:47 UTC.
• Kim uchun: faqat foydalanuvchilarga yuborilgan signallar — ichki sinovlar kirmaydi.
• Hisob vaqtida 7 ta signal hali ochiq edi; ular yopilgach, track record dagi jonli raqamlar bu yerdagidan biroz farq qilishi mumkin.

Asosiy raqamlar

2-oktabr holatiga ko'ra, 3-chorakda yaratilgan signallar:

• 146 ta signal, shundan 139 tasi yopilgan, 7 tasi ochiq;
• 85 tasi yutgan, 54 tasi yutqazgan — win rate 61,2%;
• yopilganlar bo'yicha o'rtacha natija +1,34%, mediana +2,5%;
• profit factor 1,77 — yutgan foizlar yig'indisi yutqazganlarnikidan 1,77 baravar katta;
• o'rtacha yutuq +5,0%, o'rtacha zarar −4,5%.

Oxirgi ikki qatorga e'tibor bering: o'rtacha yutuq o'rtacha zarardan unchalik katta emas. Tizim asosan yutuqlar sonining ko'pligi hisobiga plyusda. Win rate sezilarli tushsa, natija tez nolga yaqinlashadi — buni yashirmaymiz.

Oylar bo'yicha: sentabr avgustdan zaifroq

• Avgust (12-avgustdan): 60 ta signal, hammasi yopilgan; 38 yutgan / 22 yutqazgan, win rate 63,3%, o'rtacha +1,72%, profit factor 2,01.
• Sentabr: 86 ta signal, 79 tasi yopilgan; 47 / 32, win rate 59,5%, o'rtacha +1,04%, profit factor 1,59.

Sentabrda har bir ko'rsatkich pasaygan. Haftalar kesimida (AQSh seans kuni bo'yicha) eng zaif davrlar:

• 7–11-sentabr: 19 ta yopilgan signal, o'rtacha atigi +0,78%;
• 21–25-sentabr: 6 ta yopilgan signal, o'rtacha +0,88% — signal juda kam bo'lgan hafta;
• 28–30-sentabr (chorakning oxirgi uch kuni): 14 ta yopilgan, 6 tasi yutgan, o'rtacha −0,43% — chorakdagi yagona minusli hafta.

Ketma-ket eng uzun zararlar seriyasi — 3 ta signal (yaratilish tartibida).

Zararlar: qanday ko'rinishda bo'ldi

54 ta zararning 37 tasi to'liq stop-lossda −5,0% bilan yopilgan. Qolganlari kichikroq: muddat tugashi yoki stop yaqinroq qo'yilgan holatlar. Chorakning eng yomon signallaridan bir nechtasi (hammasi −5,0%):

• KOPN — 28-avgust;
• IPW — 3-sentabr. Kuzatuv oynasida narx kirishdan −17,5% gacha tushgan — stop bo'lmaganida zarar shuncha bo'lardi;
• NEXR — 14-avgust: 4 soatda stopga urilgan; kuzatuv oynasida tushish −12,7% gacha borgan.

Stop-loss zararni yo'q qilmaydi — uni oldindan belgilangan hajmda ushlab turadi. 37 ta signal aynan shunday yopildi.

Yutuqlar

Eng yaxshi natija +11,75% — bu uchinchi maqsad (TP3) yoki trailing stop bilan to'liq chiqish. Masalan, CHAI (28-avgust), JTAI (17-sentabr) va DMRC (30-sentabr). Yutgan signallarning ko'pi (50 tasi) trailing stop bilan, 16 tasi birinchi maqsaddan keyin stop kirish narxiga ko'chirilib yopilgan.

Strategiyalar bo'yicha

• Trendline — 135 ta signal (chorakning deyarli hammasi), 128 tasi yopilgan: win rate 59,4%, o'rtacha +1,21%, profit factor 1,66.
• Rebound — 11 ta signal: 9 yutgan, 2 yutqazgan, o'rtacha +2,8%. Raqam chiroyli, lekin 11 ta signal — statistika emas. Bundan xulosa chiqarishga hali erta.

Hisobning cheklovlari — o'qishdan oldin biling

Bu raqamlar sizning hisobingizda xuddi shunday chiqmaydi. Sabablari:

1. Signal darajasida. Har signalga teng ulush, komissiyasiz, pozitsiya hajmisiz. Real portfel natijasi boshqacha.
2. Stop aynan stop narxida bajarilgan deb olinadi. Agar narx stopdan pastda ochilsa (gap), real order yomonroq narxda bajariladi va zarar −5% dan katta bo'ladi. Hisobimiz buni modellamaydi.
3. Kichik aksiyalar. Chorakdagi barcha signallar $20 dan arzon aksiyalarda bo'lgan, yopilganlarning 99 tasi (139 dan) $5 dan arzon. Bunday aksiyalarda spred keng, likvidlik past, narx keskin sakraydi — slippage real natijani yeyishi mumkin.
4. Qisqa tarix. 7 hafta va 139 ta yopilgan signal — boshlanish uchun yaxshi, lekin bozorning har xil rejimini ko'rish uchun kam.

Xulosa

3-chorak plyusda yopildi: win rate 61%, o'rtacha +1,3%, profit factor 1,8. Lekin sentabr avgustdan zaifroq bo'ldi, chorak oxiri minusda tugadi, va hisob real savdodagi xarajatlarni hisobga olmaydi. Keyingi soni — 4-chorak yakunidan keyin, xuddi shu formatda: yaxshisi ham, yomoni ham.

Har bir signalni o'zingiz ko'ring: track record. Signallar faqat halol skriningdan o'tgan aksiyalarda beriladi: halol aksiyalar ro'yxati.

Bu maqola ma'lumot uchun, investitsiya tavsiyasi emas. O'tgan natijalar kelajakdagi natijani kafolatlamaydi.