Demo savdo: pulsiz mashq, lekin jiddiy

Nega avval demo

Demo savdo (paper trading) — real bozor narxlarida, lekin virtual pul bilan savdo qilish. Ko'pchilik uni "o'yin" deb biladi va ikki-uch kun bosib ko'rib, tashlab qo'yadi. Bu xato. To'g'ri ishlatilgan demo — yangi boshlovchi uchun eng arzon o'qish joyi: bu yerda xato qilish bepul, realda esa har bir xato puldan to'lanadi.

Oldingi darslarda siz ko'p narsani o'rgandingiz: pozitsiya hajmi, R:R, stop-loss va savdo psixologiyasi. Lekin bilim va ko'nikma — boshqa-boshqa narsa. Hajmni qog'ozda hisoblay olish bilan uni har savdoda, charchagan paytda ham, ketma-ket uchta zarardan keyin ham to'g'ri hisoblash bir xil emas. Demo — bilimni odatga aylantiradigan joy.

Demo nimani o'lchaydi

• Jarayonni: buyurtma turlari (market, limit, stop) amalda qanday bajariladi, seans vaqtlari, pre-market narxlari qanchalik ishonchsiz.
• Qoidalaringizni: setupingiz umuman musbat natija beradimi? Buni faqat ko'p savdo ko'rsatadi.
• Intizomni: har savdoda stop qo'yasizmi, hajmni hisoblaysizmi, rejasiz kirmaysizmi?

Demo nimani o'lchamaydi

• Real his-hayajonni. Virtual $100 yo'qotish va o'z pulingizdan $100 yo'qotish — boshqa-boshqa tuyg'u. Realda qo'rquv va ochko'zlik kuchliroq.
• Ba'zi xarajatlarni. Limitup demosi komissiyani oladi (Interactive Brokers tarifidek), lekin spred va slippage aks etmaydi — ularni o'zingiz hisobga olishingiz kerak (pastda ko'ramiz).

Demo sizni hamma narsaga tayyorlamaydi. Lekin demoda ham zarar qilsangiz, realda boshqacha bo'lishiga ishonish uchun hech qanday asos yo'q.

Limitup demosi qanday ishlaydi

Demo savdo sahifasida $10 000 virtual balans bilan boshlaysiz. Narxlar real. Muhim qoidalar real brokerdagidek ishlaydi:

• Seans. Market order, stop-loss va trailing faqat asosiy seansda (09:30–16:00 ET) ishlaydi. Bozor yopiq paytda berilgan market order ochilishda bajariladi. Limit order va take-profit pre-market va after-hours'da ham ishlaydi.
• Gap. Narx stopdan pastda ochilsa, pozitsiya stop narxida emas, ochilish narxida yopiladi — xuddi real bozordagidek.
• Bosqichma-bosqich chiqish. Bir nechta TP qo'yib, har birida pozitsiyaning ma'lum foizini sotish mumkin. "Breakeven" yoqilsa, TP olingach stop kirish narxiga ko'tariladi. Trailing stop ham bor.
• Risk ko'rsatkichi. Buyurtma formasi stop bo'yicha riskni dollarda va balansning foizida ko'rsatadi; 2% dan oshsa ogohlantiradi. Stop qo'ymasangiz — "zarar cheklanmagan" degan ogohlantirish chiqadi.
• Savdo asosi. Har orderda manbani belgilaysiz: o'z tahlilingiz, Limitup signali yoki boshqa manba. "Nega kiryapman?" maydoniga yozganingiz jurnalga tushadi.
• Sektor taqsimoti. Bitta sektor portfelning 40% idan oshsa, sahifa konsentratsiya haqida ogohlantiradi.
• Jurnal. Har yopilgan pozitsiya jurnalga avtomatik yoziladi, yopilgandan keyin esa 10 soniyalik "xulosa" oynasi chiqadi: qanday his qildingiz, xato bo'ldimi.

Server narxni taxminan har 15 soniyada tekshiradi — sayt yopiq bo'lsa ham stop va TP ishlaydi. "Hisobni tiklash" balansni boshiga qaytaradi, lekin jurnal yozuvlari saqlanib qoladi. Demo — faqat yelkasiz xarid: short va margin yo'q, bu kursning halol yondashuviga mos.

Demoni realga yaqinlashtirish

Demoning eng katta xavfi — u haddan tashqari oson. Uni realga yaqinlashtirish uchun beshta qoida.

1. Realdagi hajm bilan savdo qiling

Demo balansi $10 000. Lekin siz realda $2 000 bilan boshlamoqchi bo'lsangiz, $10 000 ning 5% ini, ya'ni $500 ni bitta savdoda riskka tikish butunlay boshqa o'yin. Real rejangiz: $2 000 ning 1% i = $20 risk. Demoda ham aynan $20 tiking.