trader-skill: Claude uchun 11 ta skill nima qiladi?

Oktabr o'rtasida GitHub'da qiziq loyiha paydo bo'ldi: trader-skill. Muallifi Jake Schincariol, litsenziyasi MIT, ya'ni bepul. Uch haftada 1 300 dan ortiq yulduz yig'di (5-noyabr holati).

Avval bir narsani aytib qo'yay: biz uning hujjatlari va kodini o'qib chiqdik, lekin o'z pulimiz bilan ishlatib ko'rmadik. Bu maqola "oling" degani emas. Shunchaki har qismi nima qilishini tushuntiramiz.

Skill o'zi nima?

Claude'ga bitta ishni qanday bajarishni o'rgatadigan tayyor yo'riqnoma deb tushuning. Masalan, siz "Berkshire portfelini ko'rsat" deysiz, Claude esa qaysi hujjatni ochish va raqamni qanday hisoblashni skill'dan biladi. Bu loyihada shunday vazifadan 11 ta bor.

Tanlash uchun uchtasi

/trader-copycat investorning SEC'dagi 13F hisobotini o'qib, portfelini foizlarda ko'rsatadi. O'tgan chorakka nisbatan nima olgani va sotgani ham chiqadi.
/trader-analyst kompaniyaning rasmiy hisobotidan daromad, foyda va marjani oladi.
/trader-screener kompaniyalarni siz bergan qoidalar bilan tekshirib, o'tganlarini tartiblaydi.

Copycat qanday natija berishini Berkshire misolida ko'raylik. Biz raqamlarni SEC jadvalidan qayta hisobladik, README bilan to'liq mos chiqdi:

Berkshire Hathaway: eng yirik 5 ulush, %

Apple22,04%
American Express17,14%
Alphabet12,62%
Coca-Cola10,86%
Bank of America9,20%

Manba: SEC EDGAR, 13F-HR. 30-iyun holati, 14-avgustda topshirilgan. Ro'yxat halollik bo'yicha saralanmagan.

Pul va xavf uchun ikkitasi

/trader-budget pulingizni aksiyalarga bo'ladi. README misolida $5 000 olingan, 10% naqd qoldiriladi va bitta aksiyaga 25% dan ko'p ajratilmaydi. Apple'ning ulushi kattaroq bo'lsa ham, chegara uni $1 250 da to'xtatadi, ortig'i boshqalarga tarqaladi:

$5 000 qanday bo'linadi (README misoli)

Apple$1 250
American Express$1 119
Alphabet$823
Coca-Cola$708
Bank of America$600
Naqd$500

Naqd 10%, bitta aksiyaga chegara 25%. Bu loyiha misoli, tavsiya emas.

/trader-risk esa har buyurtmani siz qo'ygan chegaralar bilan solishtiradi. Oshsa, sababini aytib to'xtatadi. Qarz, short va optsion sukut bo'yicha o'chiq. Bizga shu qismi yoqdi, chunki odam ko'pincha aynan hayajonlanganda limitni unutadi.

Eng muhimi: buyurtma

/trader-broker buyurtmani oddiy matnda ko'rsatadi va javobingizni kutadi. Kodini ochib ko'rdik: bu faylning o'zi brokerga umuman ulanmaydi, faqat chiptani chiqaradi va "ha"ni yozib qo'yadi. Sukut bo'yicha demo hisob ishlatiladi. Haqiqiy buyurtmani siz ulagan broker konnektori beradi, shuning uchun uni ulash ham, tasdiqlash ham sizning qaroringiz.

Kuzatish va tartib uchun qolgan beshtasi

/trader-news sizdagi aksiyalar bo'yicha sarlavha va SEC hujjatlarini tekshiradi.
/trader-pelosi AQSh Kongressi a'zolari oshkor qilgan savdolarni jadvalga aylantiradi.
/trader-alerts narx siz bergan darajaga yetganda yoki bozor ochilganda xabar beradi.
/trader-rebalance ulushlar maqsaddan uzoqlashsa, qaytarish uchun savdolarni taklif qiladi.
/trader-tax har xarid narxini, foyda va zararni kuzatadi. Muallif ham "bu soliq maslahati emas" deb yozgan.

Nimaga e'tibor berish kerak

Hisobot kech keladi. Yuqoridagi Berkshire jadvali 30-iyundagi holat, u 14-avgustda chiqqan, ya'ni 45 kundan keyin. Shu vaqt ichida fond sotib yuborgan bo'lishi ham mumkin. Kongress savdolari ham shunday: qonun bo'yicha 45 kungacha kechikishi mumkin.

Muallifning o'zi ham yozadi: investorni nusxalash uning natijasini nusxalash degani emas. Biz ham shunday deymiz. Agar bir fond portfeli qiziqtirsa, avval superinvestorlar sahifasida o'zgarishlarini ko'ring, har aksiyani esa alohida tekshiring.

Skill ishni tezlashtiradi, xolos. Qarorni baribir siz qabul qilasiz.

Ma'lumot uchun, investitsiya tavsiyasi emas. Loyiha uchinchi tomonniki, biz unga aloqador emasmiz.

Maqolada tilga olingan aksiyalar

AAPL