day-trader-skill: Time Machine savdoni 10 000 marta sinasa, nima chiqadi?

Odatda savdo vositasini reklama qilgan odam sizga eng yaxshi natijani ko'rsatadi. day-trader-skill muallifi esa README'ga o'zi "tanga tashlashga yaqin" chiqqan misolni qo'ygan. Shuning uchun bu loyiha e'tiborimizni tortdi.

Bu trader-skillning davomi. U 16 kunda 5 mingdan ortiq yulduz yig'di. Biz hujjatlarini o'qidik, raqamlar muallifniki, qayta hisoblamadik.

Tesla

Boshidan aytamiz: muallifning o'zi ogohlantiradi, kunlik savdo qilganlarning ko'pchiligi pul yo'qotadi. Bu maqola kunlik savdoga undash emas.

Bir savdo: 11 ta skilldan qaysi biri qachon

Topish va kirish

• /trader-scanner minglab grafik ichidan naqshlarni qidiradi, masalan ochilish oralig'idan chiqish.
• /trader-news o'sha aksiya bo'yicha yangiliklarni ko'rsatadi.
• /trader-entry naqshni sham sayin kuzatib, kirish paytini aytadi.
• /trader-exit kirishdan oldin stop va nishonni belgilaydi.

Tekshirish va hisoblash

• /trader-timemachine bu haqda pastda alohida gaplashamiz.
• /trader-budget aksiya sonini hisoblaydi. README misolida bir savdoda eng ko'pi $50 yo'qotishga rozi bo'linadi, stop 5,86 dollar narida, demak 8 ta aksiya.
• /trader-risk limitlarni tekshirib, oshsa to'xtatadi.
• /trader-broker "ha" yozmasangiz, hech narsa bajarilmaydi. Sukut bo'yicha demo hisob.

Kuzatish

• /trader-alerts stop, nishon yoki yopilish vaqti kelganda chaqiradi.
• /trader-analyst hisobotlarni, /trader-pelosi esa Kongress savdolarini o'qiydi.

Time Machine nima qiladi

Reja tayyor: kirish, stop, nishon. Pul qo'yishdan oldin skill aksiyaning oxirgi 60 kundagi 5 daqiqalik shamlaridan kunning qolgan qismini 10 000 marta qayta yig'adi. Va sanaydi: necha marta avval nishonga yetdi, necha marta avval stopga, necha marta hech biriga.

README'dagi misol: Tesla, 19-oktabr, kirish 364,18 dollar.

Foyda tomoni oz farq bilan oldinda. Lekin hayajonlanishga shoshilmang. Skill xuddi shu qoidani oldingi 59 ta haqiqiy kunda ham sinagan. Qoida 33 marta ishlagan va natija teskari chiqqan:

Muallif xulosasi qisqa: tanga tashlashga yaqin. Va qo'shib qo'yadi: pul qo'yishdan oldin qarashning ma'nosi ham aynan shu.

Biz nima deymiz

Time Machine'ning eng foydali tomoni optimizm bermasligida. Ko'pchilik grafikda chiroyli naqsh ko'radi va ichida "bu ishlaydi" deydi. Bu yerda esa natija raqam bilan chiqadi.

Lekin cheklovlarini ham unutmang:

• O'tgan 60 kun kelajak emas. Hisobot, savdoning to'xtatilishi yoki kutilmagan yangilik bu oraliqda bo'lmagan bo'lishi mumkin.
• 33 marta juda kam. Bunday tanlamadan katta xulosa chiqarib bo'lmaydi.
• Stop kafolat emas. Narx keskin harakatlansa, buyurtma stopdan ancha pastda bajarilishi mumkin. Muallif ham shuni yozadi.
• Xarajatlar. Ko'p savdo, ko'p komissiya degani.

Sinamoqchi bo'lsangiz, avval demo hisobda va pozitsiya hajmini to'g'ri hisoblab ko'ring. Tezkor savdoning shariy jihatlari haqida esa ulamolardan so'rang, biz bu yerda fatvo bermaymiz.

Ma'lumot uchun, investitsiya tavsiyasi emas. Loyiha uchinchi tomonniki, biz unga aloqador emasmiz.