Anthropic'ning moliya uchun 10 ta agenti: har biri nima qiladi?

Bu safargi loyihaning farqi bor: uni mustaqil dasturchi emas, Claude'ni yaratgan Anthropic chiqargan. Repo ochiq, 41 mingdan ortiq yulduz yig'gan.

Anthropic

Oldindan aytib qo'yay, bu oddiy investor uchun qilingan narsa emas. Uning auditoriyasi banklar, fondlar va ularning tahlilchilari. Lekin ular kundalik ishini qanday bo'laklarga bo'lishini ko'rish baribir qiziq. Biz hujjatlarini o'qidik, ishga tushirmadik.

Hammasidan oldin: u nima qilmaydi

Repo boshida ogohlantirish turibdi va uni shunchaki rasmiyatchilik deb o'tkazib yubormaslik kerak. Agentlar tahlilchi ishining qoralamasini tayyorlaydi: model, hisobot, solishtirish. Ular investitsiya tavsiyasi bermaydi, bitim tuzmaydi. Har natija malakali mutaxassis ko'rib chiqishi uchun qoldiriladi.

Avvalgi maqolalarimizdagi trader loyihalardan farqi ham shu: bu yerda "qaysi aksiyani olish" degan savolning o'zi yo'q.

Tadqiqot va modellash: bizga eng yaqini

• Market Researcher. Soha yoki mavzu berasiz, u soha sharhi, raqobatchilar va o'xshash kompaniyalar solishtiruvi, g'oyalar ro'yxatini tayyorlaydi.
• Earnings Reviewer. Hisobot qo'ng'irog'i va hujjatlarni o'qib, modelni yangilaydi va izoh qoralamasini yozadi.
• Model Builder. DCF kabi baholash modellarini to'g'ridan-to'g'ri Excel'da tuzadi.

Oddiy investor uchun qiziqi Earnings Reviewer'ning mantig'i: hisobotni shunchaki o'qish emas, undan keyin "oldingi fikrim qayerda o'zgardi?" deb so'rash. Hisobot mavsumida nimaga qarash haqida alohida maqolamiz bor.

Mijozlar bilan ish

• Pitch Agent. Taqqoslashlar va tarixiy bitimlardan taqdimot tayyorlaydi. Ichida LBO hisobi ham bor. LBO kompaniyani asosan qarz hisobiga sotib olish, foizli qarzga tayangani uchun ko'plab ulamolar uni joiz ko'rmaydi. Biz uni faqat agent nima qilishini aytish uchun tilga oldik.
• Meeting Prep Agent. Har mijoz uchrashuvi oldidan qisqa ma'lumotnoma yig'adi.

Fond ma'muriyati: ko'rinmas ish

Bu to'rttasi unchalik jozibali emas, lekin aynan shu yerda vaqt ko'p ketadi:

• Valuation Reviewer fond hujjatlarini qabul qilib, baholash shablonini ishlatadi.
• GL Reconciler hisob daftaridagi nomuvofiqlikni topadi va sababini kuzatadi.
• Month-End Closer oy yakuni yozuvlarini tayyorlaydi.
• Statement Auditor investorlarga yuboriladigan hisobotlarni tarqatishdan oldin tekshiradi.

Oxirgisi KYC Screener: yangi mijoz hujjatlarini o'qib, qoidalar bo'yicha tekshiradi va kamchiliklarni belgilaydi.

Qutida yana nima bor

Konnektorlar moliyaviy terminallarga ulanadi, ularning ko'pchiligi esa alohida pullik obunani talab qiladi deb hisoblang. Plaginlarning bir qismi /comps, /dcf, /earnings kabi buyruqlar beradi.

Bizning xulosamiz

O'zbekistondagi oddiy investorga bu repoda to'g'ridan-to'g'ri ishlatadigan narsa kam. Foydasi boshqa joyda: katta moliya idoralari AI'ga qanday ish topshirayotganini ko'rsatadi. Ular "bozorni bashorat qil" demayapti. Ular zerikarli, aniq va tekshirsa bo'ladigan ishlarni berib, oxirgi imzoni odamda qoldiryapti.

Bizningcha, AI'dan foydalanmoqchi bo'lgan har bir investorga shu yondashuvning o'zi yetarli saboq.

Ma'lumot uchun, investitsiya tavsiyasi emas. Biz Anthropic bilan aloqador emasmiz.