TradingAgents: 12 ta AI agent bitta aksiyani qanday muhokama qiladi?

Tasavvur qiling, bitta aksiya haqida qaror qilish kerak. Yaxshi savdo firmasida buni bir odam hal qilmaydi: kimdir hisobotni o'qiydi, kimdir grafikka qaraydi, kimdir "yo'q, bu xavfli" deb e'tiroz bildiradi.

TradingAgents aynan shu tartibni AI bilan takrorlaydi. README'da jamoalar sanalgan, biz esa kodni ochib agentlarni birma-bir sanadik. Jami 12 ta chiqdi. Ishga tushirib sinamadik, bu yerda faqat ularning vazifasi haqida gapiramiz.

To'rtta analitik

Ular bir vaqtda ishlaydi, har biri o'z hisobotini yozadi:

• Fundamental analitik moliyaviy hujjatlarni o'qiydi, kompaniya sog'lommi va xavf belgilari bormi, shuni qidiradi.
• Bozor analitigi grafikka qaraydi. Vaziyatga qarab 8 tagacha ko'rsatkich tanlaydi, masalan RSI va MACD.
• Yangiliklar analitigi oxirgi bir haftadagi kompaniya va jahon yangiliklarini ko'radi.
• Kayfiyat analitigi sarlavhalar, StockTwits va Reddit'dagi gaplarni yig'adi. Unga yozilgan yo'riqnomada yaxshi bir gap bor: voqea bilan shaxsiy fikrni aralashtirma.

Bahs: eng qiziq qismi

Keyin ikki tadqiqotchi bir-biriga qarshi chiqadi. Bull aksiya nega o'sishi mumkinligini himoya qiladi, bear esa nega olmaslik kerakligini. Ular shunchaki ro'yxat o'qimaydi, bir-birining dalillariga javob qaytaradi.

Fikr yaxshi, chunki odam odatda bir qarorga kelib olib, keyin faqat shuni tasdiqlaydigan ma'lumot qidiradi. Bu yerda qarshi fikr tizimga ataylab qo'yilgan. Tadqiqot menejeri bahsni yakunlab, treyderga aniq reja beradi.

Treyder va xavf jamoasi

Treyder rejani o'qib, olish, sotish yoki kutishni taklif qiladi, qachon va qancha ekanini ham belgilaydi.

Keyin uchta xavf tahlilchisi bahslashadi: biri katta foydani ko'zlaydi, biri pulni asraydi, uchinchisi ikkovining orasidagi muvozanatni qidiradi. Bir xil ma'lumotga uch xil qarash.

Oxirgi so'z

Portfel menejeri qaror beradi. Natija besh darajadan biri bo'ladi: sotib olish, ko'paytirish, ushlab turish, kamaytirish yoki sotish. README'ga ko'ra tasdiqlangan buyurtma simulyatsiyaga boradi, repoda haqiqiy brokerga ulanadigan modul topmadik.

Loyiha tirikmi?

Bu savolga javob berish uchun yulduzdan ko'ra relizlar yaxshiroq ko'rsatkich. Fevraldan beri 15 ta reliz chiqqan, sentabr va oktabrda esa uchtadan:

Mashhurligi esa bahsga o'rin qoldirmaydi. Biz AI Tools uchun ko'rib chiqqan loyihalar orasida eng ko'p yulduz shunda:

Bizning fikrimiz

Bu dasturchi uchun vosita. Ishga tushirish uchun Python 3.11 va AI modeli kaliti kerak, har tahlil esa model narxiga tushadi. Oddiy investorga eng foydalisi kodning o'zi emas, balki undagi tartib: qaror qilishdan oldin qarshi fikrni eshitish va xavfga turlicha qarash.

Buni AI'siz ham qilsa bo'ladi. Keyingi safar aksiya olmoqchi bo'lsangiz, "nega olmasligim kerak?" degan savolga uchta dalil yozib ko'ring.

Mualliflarning o'zi ham ochiq aytadi: bu tadqiqot vositasi, moliyaviy maslahat emas. Natija tanlangan modelga, davrga va ma'lumot sifatiga bog'liq.

Ma'lumot uchun, investitsiya tavsiyasi emas. Loyiha uchinchi tomonniki, biz unga aloqador emasmiz.