ai-hedge-fund: AI Buffett yoki Graham kabi o'ylay oladimi?

"AI Warren Buffett kabi aksiya tanlaydi" degan gapni eshitsangiz, shubha bilan qarang. Lekin ai-hedge-fund loyihasi nima qilayotganini bilish foydali, chunki ichidagi fikr ancha oddiy va o'rganishga arziydi.

Buni qanday bildik? Kodini ochdik. Har investor uchun alohida fayl bor, ichida esa AI'ga berilgan matnli ko'rsatma: "Sen falonchisan, mana shu savollardan o'tib chiq". Boshqa sir yo'q. Ishga tushirib ko'rmadik, shuning uchun natijasi haqida gapirmaymiz.

Mualliflar bir narsani ochiq yozgan: bu odamlarning o'zi emas, ularning ommaga ma'lum falsafasining soddalashtirilgan nusxasi. Ular loyihani qo'llab-quvvatlamaydi ham.

Beshovi nimaga qaraydi

Buffett. Kompaniyani savdogar emas, egasi sifatida baholaydi. Biznes tushunarlimi, raqobatdan himoyasi bormi, boshqaruv pulni yaxshi ishlatadimi, qarzi kammi, narxi o'rinlimi. Oxirgi savol esa: buni o'n yil ushlab tura olasizmi?

Graham. Hammasidan oldin xavfsizlik chegarasi. Narx ko'rsatilgan foyda va kapitalga nisbatan pastmi? Moliyaviy holat mustahkammi, foyda barqarormi? Kelajakdagi o'sish uchun qimmat to'lashga shubha bilan qaraydi.

Lynch. Avval kompaniyani turkumga ajratadi: tez o'suvchi (foyda 20% dan ortiq), barqaror (10–12%), sekin o'suvchi yoki qayta tiklanayotgan. Keyin P/E ni foyda o'sishi bilan solishtiradi.

Munger. Teskarisidan o'ylaydi: bu sarmoya nimadan barbod bo'lishi mumkin? Agar raqamlar aniq manzara bermasa, uni "juda qiyin" qutisiga solib, neytral qoladi. Eng yoqqan bandimiz shu bo'ldi: tushunmasangiz, tegmang.

Druckenmiller. Darajaga emas, yo'nalishga qaraydi: o'sish tezlashyaptimi yoki sekinlashyaptimi? Faqat foyda va xavf nisbati juda qulay paytda harakat qiladi. Bu personada short ham bor. Short ko'plab ulamolar nazarida joiz emas, biz uni faqat loyihada nima borligini aytish uchun tilga oldik.

Qancha muddatga qaraydi

Har personaga baho berish muddati ham yozilgan. To'rttasida bir savdo yili (252 kun), Druckenmiller'da yarim yil:

Persona bo'lmagan qism

Loyihada bitta tizimli model ham bor: hisobotdan keyingi narx siljishi (post-earnings drift). U AI'ning "fikri" emas, oddiy qoidaga asoslangan model. README'da ikkala turdagi strategiya bitta jamoada ishlashi mumkinligi yozilgan: xuddi fonddagi alohida bo'limlar kabi.

Cheklovlar

• Haqiqiy savdo emas. README'da to'g'ridan-to'g'ri yozilgan: tizim haqiqiy savdo qilmaydi, loyiha ta'lim va tadqiqot uchun. Demo pul va tarixiy sinov rejimlari bor.
• Ma'lumot pullik bo'lishi mumkin. Narx va hisobot uchun Financial Datasets kaliti, AI uchun yana bir model kaliti kerak.
• Loyiha qayta yozilmoqda. Yangi yadro hujjatida "ish jarayonida" deb belgilangan, shuning uchun tafsilotlar o'zgarishi mumkin.
• Ism kafolat emas. Buffett'ning nomi yozilgan ko'rsatma Buffett'ning tajribasini bermaydi. Bu shunchaki yaxshi yozilgan savollar ro'yxati.

Bizningcha, eng foydali joyi

Dasturni o'rnatish shart ham emas. Personalarning savollarini olib, o'zingizning aksiyangizga qo'llab ko'ring. Masalan, Lynch kabi "bu kompaniya qaysi turkumga kiradi?" yoki Munger kabi "bu nimadan barbod bo'lishi mumkin?" deb so'rang.

Haqiqiy investorlar aslida nima qilganini ko'rmoqchi bo'lsangiz, superinvestorlar sahifasida ularning SEC hisobotlari bor.

Ma'lumot uchun, investitsiya tavsiyasi emas. Loyiha uchinchi tomonniki, biz unga aloqador emasmiz.